अन्नपूर्ण मतसर्वेक्षण: प्रत्यक्षमा गठबन्धन अगाडि, धेरैको चाहना ओली प्रधानमन्त्री

काठमाडौं, मंसिर १

अन्नपूर्ण मिडिया नेटवर्कले गरेको जनमत सर्वेक्षणले समानुपातिकमा एमाले र प्रत्यक्षमा कांग्रेसले बढी सिट जित्ने देखाएको छ । समग्रतामा दुवै दल समान हैसियतमा रहने पाइएको छ ।

भावी प्रधानमन्त्रीमा कसलाई चाहनुहुन्छ ? भन्ने प्रश्नमा भने अत्यधिकले केपी शर्मा ओलीलाई चाहेका छन् । अहिलेसम्मका प्रधानमन्त्रीमध्ये को सबैभन्दा असल थिए ? भन्ने अर्को प्रश्नमा पनि अधिकांशको जवाफ ओली नै रहेको पाइएको छ ।

७७ जिल्ला, १ सय ६५ निर्वाचन क्षेत्रका १९ हजार ८ सय ५८ मतदातामा उक्त सर्वेक्षण गरिएको हो ।

असोज ३० देखि कात्तिक १३ सम्म यसका लागि सर्वेक्षकहरू हरेक क्षेत्रमा खटाइएका थिए । प्रमुख दलले घोषणापत्र सार्वजनिक गरेपछि पुनः ३ दिन सर्वेक्षण गरिएको थियो ।

गठबन्धन अगाडि

जनमत सर्वेक्षण परिणाम हेर्दा एमाले-जसपा गठबन्धनभन्दा सत्तारुढ गठबन्धन नै केही ठूलो बन्ने देखिन्छ । प्रत्यक्ष र समानुपातिक जोड्दा कांग्रेसको ९५ देखि १ सय ५, माओवादीको ३० देखि ४०, एकीकृत समाजवादीको ९ देखि १२, लोसपाको २ देखि ४ र जनमोर्चाको १ देखि २ सिट आउने अवस्था छ । अर्कातिर एमालेको ९० देखि १०० र जसपाको ८ देखि १२ सिटका लागि सर्वेक्षणकर्ताले मत जाहेर गरेका छन् ।

अन्यमा राष्ट्रिय स्वतन्त्र पार्टी १० देखि १५, राप्रपा ६ देखि १०, नेमकिपा र नागरिक उन्मुक्ति पार्टी १-१ र स्वतन्त्र उम्मेदवार ६ देखि १० विजयी हुने स्थिति देखिन्छ।

प्रत्यक्षतर्फ कांग्रेस ५९ देखि ६३, माओवादी १७ देखि २१, एकीकृत समाजवादी ९ देखि १२, लोसपा १ देखि ४ र जनमोर्चा १ देखि २ सिटमा रहनेछन् । एमालेले ४७ देखि ५२ र जसपाले ४ देखि ८ सिट ल्याउने स्थिति छ । त्यस्तै राष्ट्रिय स्वतन्त्र पार्टी १ देखि ५ र राप्रपा २ देखि ६ सिटमा सीमित हुन सक्छन् ।

धेरैको चाहना : ओली प्रधानमन्त्री 

नेपालको अबको प्रधानमन्त्री को होला ? भन्ने प्रश्नमा सहभागीमध्ये ३१.१३ प्रतिशतले केपी ओली छानेका छन् । २०.६९ ले शेरबहादुर देउवा, ११.२६ ले पुष्पकमल दाहाल, १२.०६ ले अन्य र २४.८६ ले कोही पनि होइन भन्नेमा मत दिएका छन् । अन्य दलमा भोट हाल्न चाहनेले समेत प्रधानमन्त्रीमा ओलीलाई अघि सार्न चाहेका छन् ।

त्यस्तै अहिलेसम्मका प्रधानमन्त्रीमध्ये सबैभन्दा राम्रो कार्यकाल कसको रह्यो ? भन्नेमा ३४.६० ले केपी ओली भनेका छन् । देउवालाई रुचाउने १२.२०, दाहाललाई छान्ने १३.०९, अन्यलाई १३.३३ र कोही पनि होइन भन्नेलाई २६.७९ प्रतिशतले मत दिएका छन् ।

समानुपातिकमा एमाले ठूलो 

सर्वेक्षणमा सहभागीले समानुपातिकतर्फ एमालेको ३४ प्रतिशत (४० सिट), कांग्रेसको ३० प्रतिशत (३६ सिट), माओवादीको ११ प्रतिशत (१४ सिट), राष्ट्रिय स्वतन्त्र पार्टीको ९ प्रतिशत (१० सिट) तथा जसपा र राप्रपाको ४-४ प्रतिशत (५-५ सिट) को प्रक्षेपण गरेका छन् ।

मिडिया आउटलेटको सहकार्यमा अन्नपूर्ण मिडिया नेटवर्कले यो अनुसन्धान गरेको हो । यसमा ‘मार्जिन अफ इरर’ ५ प्रतिशत ठानिएको छ ।