साझा कथा,
कम्बोडियास्थित ग्राण्ड डायमण्ड सिटी होटल (क्यासिनो)मा आगालागी भएपछि ज्यान जोगाउन १२ औं तलाबाट हामफाल्दा मृत्यु भएका निराकार पाण्डेको शव आज राति नेपाल ल्याइँदैछ ।
झापा बिर्तामोड स्थायी घर भएका निराकारको गत पुस १५ गते बिहान मृत्यु भएको थियो । कम्बोडियामा सरकारी पक्षबाट शवको प्रमाणीकरण नहुँदा शव ल्याउन ढिलाइ भएको थियो । तर, शव ल्याउने प्रक्रियाका लागि नेपालबाट मृतक पाण्डेको सबै कागजात पठाएसँगै कम्बोडिया सरकारले शवको प्रमाणीकरण गरी नेपाल पठाउने व्यवस्था मिलाएको हो ।
निराकारका बुवा अग्नि पाण्डेले आज थाइल्याण्डबाट नेपाल एयरलायन्समा छोराको शव आउने बताए । उनले आज राति १०ः३० बजे शव काठमाडौं आइपुग्ने र राति नै शव झापा लैजाने तयारी गरिएको पनि जानकारी गराए । निराकारको मृत्युपछि दुःख व्यक्त गर्दै प्रधानमन्त्री पुष्पकमल दाहाल ‘प्रचण्ड’ले छिटो शव नेपाल ल्याउन सरकारी अधिकारीलाई निर्देशन दिएपछि सरकारकै खर्च र सरकारी प्रकृयामा नै शव नेपाल ल्याउन लागिएको हो ।
