साझा कथा । अभिनेता पल शाहको कथा/निर्देशनमा ‘तिमिलाई हेर्ने बानी पर्यो’ बोलको गीतको भिडियो सार्वजनिक भएको छ । अभिनेता पल शाहको करिब ११ महिनाको कारागार बसाई पछिको यो पहिलो म्युजिक भिडियो हो । पुष्पन प्रधानको शब्द संगीतमा १ बर्षअघि सार्वजनिक गरिएको गीतलाई अभिनेता शाहको वास्तविक जीवनकथासँग मेल खाने गरी फिमेल भर्सन निकालिएको हो ।
अन्नु चौधरीको स्वरमा रहेको गीतमा अभिनेता शाह एक बालिकामाथि करणी गरेको अभियोगमा हिरासत पुगेको र रिहाभएसम्मको कथालाई समावेश गरिएको छ । गीतमा शाहले आफुले प्रहरी समक्ष आत्मसमर्पण गरेपछिको भोगाइलाई भिडियोमा उतार्न खोजेका छन् तर उनले भिडियोमा आफु के कारणले कारागार गएको त्यो भने स्पष्ट खुलाएका छैनन् । गीतले मायाकै कारण अभिनेता शाह जेल जान परेको भाव दर्शाएको छ ।
सार्वजनिक गीतको भिडियोमा अभिनेता पल शाह र मोडल सनिशा भट्टराईको अभिनय रहेको छ भने भिडियोको कथा, निर्देशन अभिनेता पल शाह आफैले नै गरेका छन् । म्युजिक भिडियोको छायाङ्कन बुद्ध थापाले गरेका हुन भने भिडियोको सम्पादन र कलरिङ सुप्रीम पराजुलीले गरेका छन् ।